భగవాన్ శ్రీ సత్యసాయి బాబా

భగవాన్ అనే పదానికి మూలపదం భాగ్యవాన్ అనే సంస్కృత పదం. తెలుగులో భగవంతుడు అంటే భాగ్యవంతుడు అన్న మాట.

నేను భాగ్యవంతుడిని (భగవంతుడిని) ఎందుకు కాదు? అనే ప్రశ్నను అప్పుడప్పుడు మనకు మనం వేసుకొని ఆలోచించాలి. అలా ఆలోచించడం వల్ల ఖచ్చితంగా ఉపయోగం ఉంటుంది.

ఆధ్యాత్మిక గురువులను భగవాన్ అని పిలవడం భారతదేశంలో అనాదిగా వస్తున్న సాంప్రదాయం. ‘భగవంతుడు’ అంటే ఏమిటి అన్నది తెలుసుకోవడం అన్నది ఎన్నో రకాలుగా భాగ్యాన్ని పొందడమే. నేను ఎవరు, ఏమిటి అన్నది తెలుసుకోవడం అన్నది కూడా అంతే ముఖ్యమైనది.

తాను ఏమిటో తెలుసుకున్న ప్రతివాడూ భాగ్యవంతుడే! తెలుసుకోని వాడు ఎంత సంపాదించినా కాలేడు!! పైగా ఒక గురువును విమర్శించడం ద్వారా మరింత అభాగ్యుడు అవుతాడు.

గౌతమ బుద్ధుడు 40 సంవత్సరాలు ఆధ్యాత్మిక సేవ చేశాడు. ఆయనను అందరూ భగవాన్ అని సంబోధించే వారు. బ్రతికున్నప్పుడు ఆయన మీద ఎన్నో ఆరోపణలు, కుట్రలు, హత్యా ప్రయత్నాలు జరిగాయి, శ్రద్ధగా నేర్చుకున్నవాడు బాగుపడ్డాడు, లేని వాడి ఇంకా కష్టాలు పడుతున్నాడు. శ్రీ కృష్ణుడిని కూడా భగవాన్ అనే సంబోధించారు. బ్రతికున్నప్పడు ఆయనకు కూడా ఇటువంటి సత్కారాలు తప్పలేదు… వేదాంతం అనగానే విపరీతమైన విమర్శలు, దాడులు.

అందుకే ఆధ్యాత్మిక బోధనలు అడవులకు తరలిపోయాయి. నిజంగా తెలుసుకోవాలి అనుకునే వాడికి కష్టసాధ్యం అయ్యాయి. అయితే “శ్రద్ధావాన్ లభతే జ్ఞానం” అని భగవద్గీతలో చెప్పినట్లు పట్టుబట్టి ప్రయత్నించిన వాళ్ళందరు కాలాతీతంగా తెలుసుకుంటూనే ఉన్నారు.

బాబా గారు కూడా తెలుసుకున్నారు. ఆయన భాగ్యవంతుడు. అయన తెలుసుకున్న సత్యాన్ని అతను చెప్పాడు. సంగీతం తెలిసిన వాడికి మాత్రమే మరొకడి సంగీతం అర్ధమవుతుంది. లెక్కలు కావచ్చు, ఆధ్యాత్మికత కావచ్చు. అర్ధం కాకపోతే, రామానుజం ఫార్ములాలు పిచ్చివాడి గీతల్లా కనిపిస్తాయి [1], అందుకని మిడిమిడి జ్ఞానంతో మనం పళ్ళు ఇకిలించడం మానాలి. విషయం అర్ధం కావాలంటే అందులో పరిశోధన చేసి ఉండాలి, స్వానుభవం పొందాలి.

జీవితపు కడపటి క్షణాల్లో, మన జీవితాన్ని సింహావలోకనం చేసినప్పుడు అద్భుతంతో ఆహా అని ఆనందంతో ముందుకేగవచ్చు లేదా కోల్పోయిన అవకాశాలను చూసి ఓహ్ అని బాధపడవచ్చు. ఇంతటి మహత్తర జీవితానికి ఎంత ఆనందమో…

మానవసేవయే మాధవ సేవ అని నమ్మి ఆచరించిన మహనీయులలో ఆయన ఒకరు. ప్రపంచ వ్యాప్తంగా కోట్లాది జీవితాలకు స్పూర్తినిచ్చిన, ఇస్తున్న భగవాన్ శ్రీ సత్యసాయిబాబా గారికి నాగన్న వందనం, హాట్సాఫ్.