సంసారం, ఆధ్యాత్మిక ధృక్పధం, పరిశోధన, విజ్ఞానం, నిర్వాణం

నిన్న మధ్యాహ్నం న్యూజెర్సీ నుండి స్నేహితులు ఫోన్ చేశారు.
అంతా కలిసి మూడు గంటల పాటు ధ్యానానికి కూర్చోబోతున్నారట.

మాటలో మాటగా గురువు గారు బ్రహ్మర్షి పత్రీజీతో జరిగిన సంభాషణను చెప్పడం జరిగింది.
ఫోన్లో మాట్లాడుతూ పత్రీజీ గారిని అమెరికాకు రామ్మని ఆహ్వానించాడట.
అమెరికా వస్తే ఏం ఇస్తావు అని అడిగితే,
ఏది కావాలంటే అది ఇస్తాను సార్ అని జవాబిచ్చాడట.
కొండ మీది కోతిని తెస్తావా అని ఆయన అడిగారట.

ఇది విన్న వెంటనే,
ఆయన ఎవరినీ ఏ ప్రతిఫలం అడగరని నాకు బాగా తెలుసు కాబట్టి,
రెండు క్షణాలు ఆలోచించి..
అప్పటికప్పుడు ఇలా వివరించాను:

కొండ అంటే రెండర్థాలు ఉన్నాయి; ఒకటి అందరికి తెలిసినదైతే, రెండోది శరీరం అని.
మచ్చుకు, చిన్న పిల్లలను బంగారు కొండ, బుజ్జికొండ, చిట్టికొండ అని పిలవడం మనకు తెలుసు కదా.

కొండ (శరీరం) మీద ఉన్నది, దాని అధిపతి ఎవరంటే అది మనసు.
మనసును కోతితో పోల్చడం గురించి ధ్యానులకు ప్రత్యేకంగా చెప్పవలసిన అవసరం లేదు.

ఈ కొండపై ఉన్న కోతిని (మనసును) తేవాలంటే, ముందు పట్టుకోవాలి, అంటే మనసును నిలపాలి.
అప్పుడు మాత్రమే కోతిని తెచ్చే(నియంత్రించడం) ప్రయత్నం చెయ్యగలం.

సార్ ఉద్దేశ్యం అదే కావచ్చు అని ముగించాను.